राष्ट्र बैंकद्धारा लघुवित्तको नयाँ इजाजत स्थगित

राष्ट्र बैंकको बैंक तथा वित्तीय संस्था नियमन विभागले लघुवित्त कम्पनीको इजाजत दिने कार्य स्थगित गरेको छ ।यसअघि  वित्तीय पहुँच कम भएका १० जिल्लामा प्रधान कार्यालय स्थापना गरी उक्त जिल्लाहरुमा नै कार्यक्षेत्र रहने लघुवित्तलार्इ इजाजत दिँदै अाएकाेमा अब भने सो जिल्ला सहित सबै क्षेत्रमा लघुवित्त स्थापना तथा वित्तीय कारोबार गर्न इजाजत स्थगित गरिएको बैंकले जनाएको छ ।

केन्द्रीय बैंककाे  बैंक तथा वित्तीय संस्था नियमन विभागले यसअघि असोज ११ गतेदेखि वित्तीय पहुँच कम भएका दश जिल्लाहरु मनाङ्ग, जुम्ला, हुम्ला, डोल्पा, कालीकोट, मुगु, जाजरकोट, बझाङ, बाजुरा र दार्चुलामा कार्यक्षेत्र रहने संस्था बाहेक अन्य जिल्लामा इजाजत बन्द गरेकाे  थियो ।

नेपाल राष्ट्र बैंकले गत आर्थिक वर्ष ०७३/०७४ मा वित्तीय पहुँच कम भएका १० जिल्ला  बाहेक अन्य जिल्लामा लघुवित्त खोल्न नदिने नीति लिएकोमा चालु आव २०७४/७५ देखि देशभरी इजाजत स्थगन गरेको राष्ट्र बैंकले जनाएको छ । हाल देशभर ५० भन्दा बढी लघुवित्त सञ्चालनमा रहेका छन् ।